ကြည့်ခြင်းအနုပညာ
တချို့မျက်လုံးတိက
ပုံမှန်
တချို့မျက်လုံးတိက
ပုံမမှန်
တချို့မျက်လုံးတိက
အပါးမှုန်
တချို့မျက်လုံးတိက
အဝီးမှုန်
ဇာပိုင်ပင်ဖြစ်ဖြစ်
တခုခုကြောင့်
တခုခုကို ရင်းရရေပိုင်
တခုခုကို
မြင်ချင်ရေခါတော့ခါ
အနုညံ့ဆုံးအသားအရီနန့်မျက်လွှာချေတိကို
ဒါရိုက်တာ
အလိုတကျ
ပုံစံအမျိုးမျိုးနန့်
သရုပ်ဆောင်ခိုင်းထားရေ
အကြည့်တိက
စုံလို့ လင်လို့ ... ။
တည့်တည့်ကြည့်လူ
ကြည့်ရေ
ဘေးသတ်ကြည့်လူ
ကြည့်ရေ
စောင်းလို့ကြည့်လူ
ကြည့်ရေ
မော်လို့ကြည့်လူ
ကြည့်ရေ
ငုံ့လို့ကြည့်လူ
ကြည့်ရေ
စိုက်လို့ကြည့်လူ
ကြည့်ရေ
မောတိမောတာသတ်လို့ကြည့်လူ
ကြည့်ရေ
နပျိုးပင်ထောင်လို့ကြည့်လူလေ့
ကြည့်သိရေ ... ။
ယင်းပိုင်ကြည့်ကတ်စွာမှာ
တချို့က အမြင်ကောင်းရေ
တချို့က အကောင်းမြင်ရေ
တချို့က အမြင်ဆိုးရေ
တချို့က အဆိုးမြင်ရေ
တချို့က ဦးနှောက်ကို
မြင်ရေ
တချို့က နှလုံးသားကို
မြင်ရေ... ။
ဇာလူက ဇာပိုင်ကြည့်လို့
ဇာပိုင်မြင်မြင်
ငါက အကန်းတယောက်ရာ
ယုံကြည်စိတ်ချရရေ
အကြည့်တိကို မြင်ဖူးချင်ရေ
ရိုးသားဖြူစင်ရေ
အကြည့်တိကို တောင့်တမိရေ ... ။
သဘာဝစီမံချက်အတိုင်း
နီရောင်ကို
လရောင် မသောက်ခင်စပ်ကြားထိ
အိပ်တန်းဝင်ငှက်ချေတိ
တေးသံသာနန့်
အိပ်တန်းဝင်ငှက်ချေတိကို
မြင်ရနိုးနိုး
ဆည်းဆာပန်းချီကို
မြင်ရနိုးနိုး
ပင်လယ်လှိုင်းအကကို
မြင်ရနိုးနိုး
စိမ်းလန်းအီးချမ်းရေ
တောတောင်တန်းတိကို မြင်ရနိုးနိုး
အလင်းဖုံးထားရေ
မျက်လုံးတစုံကို တည်ငြိမ်စွာ ဖွင့်ပနာ
စိတ်အာရုံနန့်မှန်းဆယင်း
နှလုံးသားနန့်ကြည့်နီမေ ... ။ ။
ခိုင်ထွီး
No comments:
Post a Comment