ထွက်ပေါက်

နှလုံးခုန်နှုန်းမြင့်မားမှုကို

အယင်ခေါက် မသောက်တေ ကော်ဖီခါးခါးနန့်

တက်စားထိုး ကုသမှုခံယူဖြစ်တေ ... ။

ဦးနှောက်မွန်းကျပ်မှုကို

ရော့(ခ)အပြင်းစား ဂီတအာဟာရနန့်

ယမကာမြစ်မှာ ဂေါင်းဆီးဖြစ်တေ ... ။

ငါ့ ဝေဒနာ အနာစိမ်းတိ နာကြင်တိုင်း

မေတ္တာအလင်းရောင်နန့် ဆက်သွယ်ထားရေ

ကောင်းကင် နန့် မြီပြင်ရို့ကို ကြည့်ဖြစ်တေ ... ။

လူ ညီမျှခြင်း

တာဝန်နန့် ဝတ္တရားဆိုကေ မှားဖို့လား

မှားမှား ... မှန်မှန်

လူခန္ဓာကိုယ်ဧ့ အကြီးမားဆုံး

အင်္ဂါအစိတ်အပိုင်းတခုဖြစ်တေ အရီပြားကို

ပါးပါးချေ လှီးပနာ မင်းရို့အတွက် ဖြန့်ခင်းပီးမေ

ငါ့ကို ...

ကဗျာတပုဒ်တော့ခါ စပ်ခွင့်ပီး

ငါ ... အသက်တရက် ရှည်ချင်လို့ရာ ... ။

ခိုင်ထွီး

ခွဲစိတ်ခန်းထဲက

ရောဂါလက္ခဏာ အထူးအဆန်းနန့်

ကူဖော်မပါရေ လူနာတယောက်

တန်းခါးမခေါက်ပဲ ကြိုင်းညီးပနာ

ခွဲစိတ်ခန်းထဲသို့ ဝင်လားခရေ ... ။

ဆီးပီးသူ ခြောက်သံ

သူနာပြု ငေါက်သံ

ဆရာဝန် ဟောက်သံ

ဆောင့်သံ ဆူသံရို့ အပြန်အလှန်

ဖနောင့်တိုက်ယင်း ကြိုဆိုနီကတ်စွာ

အယ်(လ)နီနို ပူဆာစွာနန့် ဆိုင်ဖို့လား ... ။

လူနာတောင်အသက်မငင်ရသိ

ဖောင်ဒေးယှန်း၊ ပါးနီ၊ နှုတ်ခမ်းဆိုး၊ မာဆကားရာ

မိတ်က(ပ)တန်ဆာပလာ အစုံပါရေ လူတယောက်

သစ္စာပန်းအတုတစည်း ကိုင်ထားရေ လူတယောက်

အပြိုင်အဆိုင် မျက်စောင်းထိုးပနာ ထိုင်ခုံလုပွဲကျင်းပ ... ။

ဘုရားတရား မကယ်နှိုင်ရေ ဒေအရပ်မှာ

ကယ်တင်သျှင်၊ ဖန်ဆင်းသျှင်ရို့စကားတိကို နားဆင်ယင်း

လူနာမှာ မျက်ရည်ရွှမ်းရွှမ်းနန့် ... ။

ခိုင်ထွီး