နိုင်ငံတော်
နိုင်ငံကြီးသားတယောက်
ဆွံ့အ နားမကြား မျက်လုံးကြောင်တောင်နန့်
ကလေ့မေချေတယောက်ကို
လူမြင်ကွင်းမှာ အဓမ္မပြုကျင့်ရေ
အချေတယောက် မွီးရေ
အချေစွာ သူ့အဖကို တခါလေ့ မမြင်ဖူး
"ဘာဘာ" လို့ အားရပါးရ ခေါ်ပစ်ချင်ရေ ... ။
ယုံချင်ယုံ မယုံချင်နီ
အဂေါင့်ဂေါင့် တယောက်ချေပင်လေ့
မသိလိုက် … မမြင်လိုက် … မကြားလိုက် …
အာရုံခြောက်ပါးဆိုစွာ
လူသားတိအတွက် အလကားလက်ဆောင်
တချို့လူတိက မသုံးကတ်
တချို့လူတိက သုံးလို့မရကတ် ... ။
ယေဒါလေ့ ...
ယင်းအချေနာမည်ကို
ကြည်ညိုဖို့ကောင်းရေ ဥပဓိရုပ်နန့် ဖြစ်လို့
"နိုင်ငံတော်" လို့ ခေါ်ကတ်တေ ... ။ ။
No comments:
Post a Comment